Er búin að vera veik heima núna í tvo daga – vona samt að ég geti skellt mér í vinnuna og jafnvel ræktina á morgun. Ég og mataræðið erum bara ekki að tala saman, ég borða alltof mikið af brauði því það er svo einfalt og fljótlegt. Svo eigum við líka stóran kassa af After Eight hérna heima sem er alltaf að kalla á mig, það blekkir mig svo mikið hvað þetta er þunnt og hvað maður er fljótur að borða þetta: ,,Þetta er ekki neitt neitt, best að fá sér tvö.. eða þrjú…”.

Rölti út í heilsubúð í dag til að kaupa mér te því ég var að drepast í hálsinum, keypti mér í leiðinni healthy límonaði (eða ég laug því að sjálfri mér – það innihélt auðvitað sykur) sem var voða gott á bragðið. Kom síðan við á kaffihúsi við hliðina á búðinni og fékk mér kaffi og GULRÓTARKÖKUSNEIÐ MEÐ RJÓMA, nema hvað. Ætli ég sé ekki eitthvað aum og vorkenni mér yfir að vera lasin með því að troða í mig sykri, virkilega gáfulegt gella, virkilega gáfulegt. Svo var ég kannski líka pínulítið að fagna því að ég fékk 8,5 á prófinu mínu, veivei. Þarf að fara að setja mér einhverjar skýrari reglur í mataræðinu, það er á hreinu.

Bjó til rosa sniðuga tómatsósu áðan til að hafa út á pasta: átti 4 stk sorrí tómata sem hímdu hnípnir inni í ísskáp, maukaði þá með töfrasprota og skellti í pott, kryddaði með einu pressuðu hvítlauksrifi, salt, pipar og oreganó og skar ca. 4 svartar ólífur niður líka og skellti út í. Lét hana svo malla þar til hún var orðin hæfilega þykk og girnileg. Kannski finnst sumum það skrítið en ég hef aldrei eldað svona sósu áður – en mikið ofboðslega var hún góð! Örugglega fín líka með niðursoðnum tómötum en það er vissulega kick að hafa þá svona ferska.

Hvíld í dag skv. prógrammi en fer í ræktina á morgun – er í þessum skrifuðum orðum að búa mér til playlista fyrir ræktina, ekki leiðinlegt það.

Jamm, helgin var nú alveg þokkalega syndum hlaðin enda ætlaði ég svosem alveg að leyfa mér það. Ís og nammi með litlu systur, áfengi í lítravís… en varð nú samt alveg stórhneyksluð á mér áðan, ég skrapp inná vídjóleigu að skila spólu (spólu? afhverju segir maður alltaf spólu þó um sé að ræða dvd disk?) og gerði mér lítið fyrir og keypti mér bland í poka fyrir fimmtíukall!!! Ég, sem kaupi mér venjulega aldrei bland í poka! Langaði bara eitthvað svo mikið í piparbrjóstsykur… en já, þetta sýnir mér að ég verð að taka með mér nesti í vinnuna, eitthvað til að nasla á kl. þrjú því annars verð ég bara hálfringluð af svengd og geri eitthvað kjánalegt Svo heldur líkaminn alltaf áfram að kalla á sukk eftir svona sukkdaga, maður þyrfti kannski að afeitra sig.
En hlaupaplanið góða byrjar á morgun, samstarfskona mín var einnig að skoða þessa síðu og fann þríþrautarplan sem lítur líka mjög spennandi út, kannski maður prófi það við tækifæri.

Arg, svo veit ég ekkert hvað ég á að hafa í kvöldmatinn, það er svo langt síðan ég og sambýlismaðurinn höfum nennt í Bónus að það er ekkert til í kotinu…

Uppfært: Eldaði þennan fína líka ofnbakaða lax í kvöldmat, með kúskús og sósu úr sýrðum rjóma, sítrónusafa, vorlauk, hunangi, kóríander, salti og pipar. Ansi gott og hollt… en svo var ég að muna að ég fékk mér nokkrar súkkulaðirúsínur í vinnunni OG við sambýlismaðurinn settumst niður áðan og fengum okkur ritzkex með camembert, sultu, villibráðarpaté og 1 hvítvínsglas… ó boj

Jæja, best að smella inn matardagbók svona eins og í gamla daga:

Morgunmatur: 1 skál Cheerios m. léttmjólk, 1 glas safi

Morgunkaffi: 1/2 kíví (var orðið mjúkt og klígjulegt svo ég hafði ekki lyst á að klára það), 1 glas sódavatn, 1 bolli kaffi með mjólk

Hádegismatur: Salatbakki með kjúkling, pasta, grænmeti, 1/2 eggi og salsasósu, 1 sykurskert kókómjólk, sódavatn.

Millimál: 1 ristuð brauðsneið m. smá smjörva, 11% osti og sykurlausri sultu, 1 hrökkbrauð með sama, 1 súkkulaðikex (skamm! var svöng þegar ég kom heim úr vinnunni)

Kvöldmatur: Kjúklingur með mangó chutney sósu (1/3 krukka mangó chutney, tæplega 1 dós 5% sýrður léttur, karrí, 1 hvítlauksrif), baunaspírum (niðursoðnar sem er nú ekkert spes, miklu betri ferskar) og brúnum hrísgrjónum. Vatn.

Er svo búin að ákveða að vera ekkert að stressa mig á ræktinni fram á föstudag, núna hefur lærdómurinn forgang en ætli ég skreppi kannski ekki í smá göngutúra til að hressa upp á þær gráu